Ankatoky ny fety : mifanitsa-kitro ny olona !

Fiteny mampihomehy io, kanefa dia marina loatra amin’izao ankatoky ny fety izao !

Inoana fa eran-tany, isaky ny tanan-dehibe toy ny eto Antananarivo dia somebiseby miantsena ny ankamaroan’ny olona amin’izao vanim-potoana izao.

Tsy dia hoe manan-katao avokoa akory, fa ao no voatery mandeha any afovoan-tanàna, ao no manantena mba hahalafo entana kely, sitrany hahay ! Ao koa indrisy, ireo tonta kely, mpangarom-paosy sy ny karazany, koa samia mailo e !

Amin’ny arabe no alehan’ny olona

Mandravaka ny tsenany ny mpivarotra. Eny, mampihaingo ny "vitrine" ny ankamaroan’ny fivarotana ("pharmacie, grande surface, épicerie") na toerana ifamezivezen’ny olona (banky, hotely, sns). Mifampirary sahady Krismasy Sambatra sy Taombaovao mahasoa e ! 

Mikatso ny fandehanan’ny fiara

Fa dia gaga foana ny tena mahita ireto vahoaka be e : mby avy aiza ka ho aiza ? hihihi 

Izany Analakely izany aloha dia e ! e ! e ! Aleo andosirana raha tsy hoe lalana tsy azo anoharana. Hatraiza hatraiza dia mitohana ny fandehanan’ny fiara. Ny ao Behoririka sy Soarano no antony. Mahagaga an ! Dia olona fotsiny hoa eny amin’ny arabe !

Ny mpivarotra amin’ny "trottoir", ny mpividy amin’ny arabe… 

Tsy ireo fanomezana fotsiny anefa no mampitombo ny isan’ny olona, toy ny hoe kiraro, fitafiana, kilalao. Fa ao dia ao koa ireo mpivarotra hani-masaka, dia eny am-pijorojoroana eny indraindray ny olona no misakafo. Oadray ! Mba mahita tsiron-kanina va amin’izany ? 

Raha izaho manokana an, dia sitrako tokoa ny filaminana aty ambanivohitra hihihi. 

Mirary fety sambatra ho anao, na izany aza. Samia mahita ny sahaza azy rey olona ô ! :-)