Andro farany amin’ity taona 2012 ity sahady ny anio !
Matetika tokoa dia fotoanan’ny jery todika ny vanim-potoana toy izao. Ary dia
efa mibanjina sahady ny taona vaovao ho avy.
Eto Antananarivo, folo taona lasa izao na mihoatra izany, dia
fanaon’ny olona ny mifampiarahaba hoe « Tratry ny farany ô ! ».
Toa vazivazy no niantombohany, raha ny fahalalako azy. Dia mifanatsafa koa ny
olona hoe « Samia ho tratry ny rahampitso e ! », miandrandra ny
Taombaovao efa antomotra.
Etsy andaniny, miomana fatratra amin’ny
« Réveillon » ny ankamaroan’ny olona. Edrey, ifaninanan’ny
toeram-pilanonana samihafa koa ny fiantsoana ny olona : sakafo, fisotro,
dihy sy fialam-boly isan-karazany no ampanantenaina izay ho avy amin’izany.
Misy ny tsy afa-manoatra, noho ny antony samy hafa, ka tsy mba anisan’ny
miari-tory.
Ka rehefa anontaniana azy izay mba fandaharam-potoana ny
alin’ny 31 desambra dia toy izao no valiny :
-- Izahay aloha dia any Befandriana no alehanay
e !
-- Any Amparafaravola ihany no sahaza ho anay
kah !
Hatsikana ilazana fa matory izy (fandriana,
farafara) ;-) Matetika ny olona efa bebe taona no misomonga toy izany.
Ary ianao ? Mba nanao ahoana ny taona 2012
niainanao ? Ho aiza ianao anio alina ? Ny firariako manokana ho anao
dia fiadanam-po, fifaliana, ary fanantenana hatrany. Tratry ny farany e !
Dia matezà ny aina, samia ho tratry ny rahampitso an !
Aucun commentaire:
Enregistrer un commentaire